O Xabarín e o rock bravú

As series de televisión, sobre todo as anglosaxoas, viven dende hai unha década unha época de gloria. Tamén houbo un momento no que en Galicia contabamos cunha televisión de calidade, no que se podían desfrutar de historias de por aí fóra faladas coma na casa.

A TVG foi unha ferramenta importantísima para a normalización lingüística, especialmente o Xabarín, ese programa pensado para a mocidade que non só funcionou como plataforma de difusión para a lingua galega senón tamén para o rock bravú.

Aquí tedes diversos materiais para afondar neste tema:

  1. A presentación sobre música galega de Daniel, o noso convidado das Xornadas: A tralla e a metralla. A música galega dende o Rock Bravú ata os nosos días 
  2.  Unha reportaxe emitida na televisión sobre a Xeración Xabarín
  3. Breve texto sobre o Xabarín
  4. A páxina web de A Regueifa, onde poderás atopar e descargar música en galego de distintos xéneros

Máis exercicios

Aquí tedes unha serie de exercicios de repaso sobre algúns dos contidos gramaticais que vimos ultimamente na aula: imperativo, pronomes átonos, conectores, tiles e demostrativos.

Exerciciosrodaimperativo_demostrativosImperativo_homens

Preme nesta ligazón para máis exercicios de Pronomes_átonos e breve texto para completar con tiles.

E neste outro para escoitar a canción de The Homens.

 

Os alimentos

Comezamos un tema novo falando de comida e de hábitos e gustos alimentarios. Aquí podedes consultar as fichas que vimos na aula.

Na primeira imaxe podedes ler a carta dun restaurante na que se ofrecen pratos típicos de Galicia como caldo, polbo á feira, xoubas con cachelos ou torta de queixo.

Carta_restaurante

Esta segunda imaxe recolle distintos diálogos que poden servirnos para falar dos nosos gustos. Por exemplo:

– Gústache a comida picante?

– A min si.

– Que ben, a min tamén!

Gustos_pronomes

Tamén se recolle nesa imaxe o uso dos pronomes, que xa sabedes que en galego van por norma xeral detrás do verbo, pero que con oracións negativas van antes del. Por exemplo:

– Comes algas?

– Si, cómoas. E ti comes algas?

– Non, eu non as como. 

Finalmente, na terceira imaxe, tedes un resumo das regras de formación de plural e un exercicio para aplicalas.

Formación_plural_alimentos

De propina unha canción de Miguel Costas e Aerolíneas Federales que tamén fala dun alimento, nesto caso, o xamón.

No seguinte documento podedes consultar a letra: Quero_xamón

Erros máis comúns

Tralo parón de Nadal, toca retomar o curso. Para ir quecendo motores, imos repasar algúns dos erros que máis se repiten nas vosas redaccións. Nesta presentación atoparedes unha serie de oracións que conteñen erros tanto estilísticos como gramaticais. Tamén podedes ver as solucións: Erros máis comúns

Como podedes ver, a confusión entre os verbos ser/estar/haber provoca moitos erros, así que este cadro pode resultarvos útil.

Ser_estar

Por outra banda, para despedir definitivamente o Nadal, aquí vos deixo unha panxoliña interpretada por Fuxan os ventos coa súa letra:

Con un sombreiro de palla
un galego a Belén foi,
mentras adouraba ao Neno,
comeulle o sombreiro o boi.
DEIXADE AOS PASTORES
DEIXÁDEOS PASAR
QUE VAN CANTAR AO REI
A XESÚS NO PORTAL!
Nunhas pallas deitadiño
i en coiriños alí está!;
sendo o Dono diste mundo
e Señor de canto hai!

 

Texto sobre a emigración 4: Unha noite na eira do trigo

Aquí tedes a composición de Manuel Curros Enríquez que vimos o outro día na aula: Cántigamáis popularmente coñecida como Unha noite na eira do trigo, a pesar de que como podedes ver esa liña non figura no poema senón que foi engadida logo nas versións musicais que se fixeron do texto.

No xardín unha noite sentada
ao refrexo do branco luar
unha nena choraba sin trégolas
os desdés dun ingrato galán.
I a coitada entre queixas dicía,
“xa no mundo non teño ninguén,
vou morrer e non ven os meus ollos
os olliños do meu doce ben”.

Os seus ecos de malenconía
camiñaban nas alas do vento
i o lamento
repetía:
“vou morrer e non vén o meu ben!”.

Lonxe dela, de pé sobre a popa
dun aleve negreiro vapor
emigrado, camiño de América
vai o pobre, infeliz Amador.

I ao mirar ás xentís anduriñas
cara á terra que deixa cruzar:
“quen puidera dar volta – pensaba-,
quen puidera convosco voar!”.

Mais a aves i o buque fuxían
sin ouír seus amargos lamentos;
solo os ventos
repetían:,
“quen puidera convosco voar!”

Noites craras de aromas e lúa
desde entón que tristeza en vós hai
para os que viron chorar unha nena
para os que viron un barco marchar!

Dun amor celestial verdadeiro
quedou solo de bágoas a proba
unha cova
nun outeiro
i un cadavre no fondo do mar.

Música:

Versión de  Uxía:  http://www.youtube.com/watch?v=iFfditBb3_E

Versión de Os Tamara e Pucho Boedo: http://www.youtube.com/watch?v=V3BHVj01mGs

Galicia es una mierda//Festa malandrómica

Xa case estamos na fin de semana, así que imos poñer algo de música. Hoxe na aula de Galego V traballamos coas letras de dúas cancións: Galicia es una mierda de Ataque Escampe e Festa malandrómica, interpretada orixinalmente polo grupo de rap Malandrómeda pero da que tamén existe unha versión por Ataque Escampe.

Aquí tedes as letras das cancións cos referentes culturais subliñados.