Como sabedes, este vindeiro martes hai que entregar a primeira redacción obrigatoria do semestre: A vida no campo fronte a vida na cidade.
Para facer unha redacción deste tipo é moi importante coñecer os conectores, esas palabras que serven para cohesionar o texto, e mais as estruturas comparativas, para contrastar información sobre dous elementos diferentes.
Premede nas imaxes para ler máis información e ver exemplos.
Tamén tedes aquí un documento con máis exercicios de comparativas.
O Centro de Estudos Galegos de Oxford convoca un concurso de microrrelatos no que poderá participar calquera alumno de galego das distintas universidades que contan cun centro que imparta esta materia.
Cómpre que o relato sexa inédito e orixinal e a súa extensión non debe superar as 270 palabras (título incluído)
O prazo de presentación remata o 1 de maio. Se estades interesadas, aquí tedes máis información:
Ante a inminente presentación oral dos vosos traballos, paréceme boa idea compartir convosco estes consellos para elaborar presentacións e expoñelas eficazmente.
Nesta primeira ligazón, pertencente ao Servizo de Normalización Lingüística da Universidade de Santiago, atoparedes consellos sobre como planificar, deseñar, redactar e expoñer con correción. Ademais, ofrecen modelos que vos permitirán axilizar o traballo.
Esta segunda páxina, realizada por Pilar Ponte Patiño, ofrece tamén directrices sobre como planificar actos orais e recolle unha serie de consellos moi prácticos, como por exemplo, que cores evitar na tipografía ou que fonte resulta máis apropiada.
Espero que vos sirvan e, sobre todo, que ensaiedes moito.
Ata o de agora sabíamos como empregar os seguintes tempos verbais: o presente, o pretérito, o copretérito, o futuro e o pospretérito, todos eles tempos de indicativo. Agora, antes de poñer fin a este semestre, é a quenda do antepretérito, o último tempo que nos queda por coñecer do modo indicativo. Aquí embaixo tedes o material relacionado con el.
Non esquezades que o día 31 é a data da proba final, que constará de contido gramatical e cultural, así como dun pequeno exercicio de audio. Por outra parte, o día 29 teredes que expoñer as vosas presentacións orais sobre o libro de lectura obrigatoria.
Aquí tedes os últimos exercicios vistos na aula sobre o pospretérito.
Faltan os arquivos de audio, que non están dispoñibles na rede, pero intentarei subilos nos vindeiros días.
Para indicar que unha acción se vai realizar no futuro podemos empregar principalmente o futuro de indicativo ou ben as perífrases verbais de futuridade: haber + infinitivo e ir + infinitivo.
Exemplos: Nadarei todos os días media hora.//Hei comer máis froitas.//Vou beber moita agua.
O futuro fórmase normalmente engadindo as terminacións: -ei, -ás, -á, -emos, -edes, -án.
Para máis información e exercicios, preme nas imaxes:
Aquí tedes tres arquivos de audio no que tres persoas explican que estaban a facer en tres datas importantes para a historia de Galicia.
Logo atoparedes un cadro para completar a información: Con que estaban? Que estaban a facer? Onde estaban? Que pasou?
Audio:
http://www.xunta.es/linguagalega/arquivos/Manual_Aula_de_Galego_2_Audio_6.wma
http://www.xunta.es/linguagalega/arquivos/Manual_Aula_de_Galego_2_Audio_7.wma
http://www.xunta.es/linguagalega/arquivos/Manual_Aula_de_Galego_2_Audio_8.wma
Nesta outra entrada viamos os principais usos do copretérito, pero aínda hai máis. Ademais de para describir costumes do pasado ou accións que se interrompen, o copretérito emprégase para expresar cortesía e respecto cara á persoa coa que falamos.
Ex: Podía dicirme a que hora pasa o tren para Pontevedra?//Quería mercar ese vestido do escaparate.
Aquí tedes dous diálogos e algúns exemplos para afondar máis no tema: O copretérito de cortesía.
Se o outro día explicabamos que o pretérito era o tempo verbal máis empregado para falar de accións realizadas no pasado, hoxe é a quenda do copretérito.
Este tempo emprégase sobre todo para describir calidades ou costumes do pasado.
Ex: Cando era pequena, levaba o pelo curto.// Adoitaba nadar no mar todas as mañás.
Pero tamén serve para falar de accións que se interrompen ou que foran planificadas pero finalmente non acontecen.
Ex: Quería mercar un xeado, pero non levaba cartos no peto.//Ía camiñando e atopei un amigo.
Podedes atopar unha explicación máis completa no seguinte PowerPoint: O copretérito.
E algúns exercicios neste documento: Exercicios copretérito.
Unha lenda urbana é unha historia incrible que circula entre a xente, que se narra de distintos xeitos e que se adoita tomar como certa, aínda que non haxa probas de que sexa verdade (a pesar de que existe a posibilidade de que estea baseada nun feito real). En moitos casos, estas lendas acadan difusión internacional, polo que é posible que distintos países compartan as mesmas historias, por exemplo, a lenda da rapaza que se aparece nun curva da estrada onde perdera a vida ou esoutra que di que os restaurantes chineses serven carne de can.
Aquí podedes atopar algunhas lendas urbanas en galego. Lembrade ademais que o día 6 de novembro tedes que entregar a vosa primeira redacción para avaliar, que consistirá nunha lenda urbana (existente ou inventada por vós) cunha extensión de entre 250-500 palabras e un interliñado de 1,5.
Está ou non está Walt Disney crioxenizado?
Galego en Zadar 